4АСН-15ВН1: 4АСН-15В / 4АСН-15Н

Мақсаты және қолданылу аясы

АШН өлшеу жүйесі мұнайды, мұнай өнімдерін немесе басқа сұйықтықтарды резервуарлардан автоцистерналарға аралас тәсілмен (жоғарғы және төменгі жағынан) құю кезінде олардың мөлшерін масса және көлем бірліктерімен, сондай-ақ тығыздығын, температурасын және қысымын автоматты түрде өлшеуге арналған.

АШН жүйесінің техникалық шешімдері

Құю постының технологиялық блоктары — зауытта дайындалған, конструкциясы толық аяқталған бұйымдар. Блоктардың конструкциясы ауыстырмалы элементтерге қол жеткізуді, оларды монтаждау мен бөлшектеуді жеңілдетеді және пайдалану кезінде қате орнатылуына жол бермейді.

Белгіленген климаттық жағдайларда ашық алаңда орналастырылатын технологиялық жабдық сыртқы орта факторларының әсеріне төзімділігі жағынан ГОСТ 15150 талаптарына сай орындалған.

Іске қосу мерзімін қысқарту үшін қондырғы жеке модульдерден тұрады. Өндіріс барысында модульдер өзара жалғанып, нақты өніммен сыналады және тапсырыс берушіге жеткізіледі.

Материалдар мен дайын бұйымдардың сапасы мен техникалық сипаттамалары өндіруші зауыттың құжаттамасымен расталған.

Құю постының құбыржолдарындағы тиекті арматура герметикалылықтың А класына сәйкес келеді. Құбыржол арматурасы оны ыңғайлы әрі қауіпсіз күтіп ұстауға және жөндеуге мүмкіндік беретіндей орнатылып, орналастырылған.

Өлшенетін өнім бар қондырғының тұйық қуыстары температура әсерінен пайда болатын сұйықтықты арнайы сыйымдылықтарға ағызатын сақтандырғыш клапандармен жабдықталған.

Өлшеу жүйесі жабық дренаж жүйесімен жинақталған.

Мұнай өнімдерін автоцистерналарға жоғарғы жағынан құюға арналған тіректер топсалы-құрастырмалы құбырлар мен телескопиялық құрылғылар жүйесінен тұрады. Құрылғының қисаюсыз жеңіл қозғалысы роликтерге арналған термиялық өңделген жолдары бар топсалармен қамтамасыз етіледі. Топсалы қосылыстардың тығыздағыштары мұнай өнімдерінің әсеріне төзімді материалдардан жасалған. Құю тіректерінің конструкциясында құрылғыны жерге тұйықтауға арналған бірыңғай электрөткізгіш контур қарастырылған.

Құю тіректері жұмыс күйінде бекіту механизмдерімен жабдықталған. Тірек жетектері қолмен басқарылған кезде құрылғы механизмдерінің өздігінен қозғалуына жол бермейді.

Шығарылатын телескопиялық ұштықтың сипаттамалары:

• Ұзындығы кез келген автоцистернаның түбімен қауіпсіз жанасуды қамтамасыз етуге жеткілікті немесе оның ұшынан цистернаның төменгі сыртқы бетіне дейінгі қашықтық 200 мм-ден аспайды.
• Ұштық ұшқын шығармайтын материалдан жасалған. Оның конструкциясы құю басталған кезде өнім ағынының тік құлауына және шашырауына жол бермейді.
• АШН жиынтығындағы өтпелі конус автоцистерна мойыншаларының диаметрлері әртүрлі болатынын ескереді.
• Жұмыс ортасының автоцистерна мойнының жиегінен асып төгілуіне жол бермеу үшін құю тірегі цистернаның толу шегін анықтайтын (авариялық) деңгей датчигімен жабдықталған.

Құю құрылғысының конструкциясы құю құбырын өнімнен толық босатуды қамтамасыз етеді және құю аяқталған кезде өнімнің цистернаға төгілуіне жол бермейді. Гараж күйіндегі құю құрылғысынан тамған тамшылар мен мұнай өнімдерінің қалдықтары тамшы жинағышқа жиналады.

Тығыздағыш қақпақта автоцистернаға құю кезінде отын буларын бөлек жең арқылы әкетуге арналған штуцер бар.

Төменнен құю тірегі мұнай өнімдерін автоцистернаға төменгі қабылдау клапаны арқылы құюға арналған.

Топсалы құбыржол өнімді тіректің жоғарғы нүктесінен автоцистернаға ағып кетпей және шығынсыз жеткізеді.

Төменнен құю тірегінің құрамындағы топсалар тіректің қозғалмалы тораптарын жалғауға және оларды тік әрі көлденең жазықтықтарда бұруға арналған.

Қосқыш бастиек мұнай өнімдерін төменнен құю кезінде автоцистернаның кері клапанына жалғауға, сондай-ақ төменнен құю тірегін гараж күйінде дренаж құбыржолындағы кері клапанға қосып орналастыруға арналған.

Амортизатор топсалы құбыржолды иілгіш құбырлармен және қосқыш бастиекпен бірге автоцистернаның кері клапанына жалғау кезінде бірқалыпты жылжытуға арналған.

Төменнен құюға арналған Ду100 бу шығару жеңі автоцистернаны толтыру кезінде көмірсутек буларын құю қондырғысынан тыс әкетеді. Жең автоцистернаға жалғауға арналған муфтамен жабдықталған.

АШН өлшеу модулі тізбектей жалғанған сүзгі-газ бөлгіштен (сүзу дәлдігі 200 мкм-ден аспайды), кері клапаннан, көлемдік немесе массалық шығын өлшегіштен және температура датчигінен тұрады.

КО жапқыш клапаны шығынды бірқалыпты реттейді. Шығынды реттеу бағдарламалық түрде жүзеге асырылады.

Гидравликалық соққыларды азайту, айдаудың қауіпсіз жылдамдығын және есепке алудың дәлдігін қамтамасыз ету үшін КО клапаны құюдың бастапқы және соңғы кезеңдерінде өнімді 21 м³/сағ-тан аспайтын шығынмен беруді қамтамасыз етеді.

Сүзгі-газ бөлгіш мұнай өнімдерінің газ-ауа қоспасын бөліп шығарады. Газды бөлу кезінде сұйықтықтың бүкіл ағыны сүзгіден өтіп, мұнай өнімдеріндегі қалқымалы қатты бөлшектер ұсталады.

АШН өлшеу жүйелерінде қоспаларды автоматты түрде енгізу жүйесін қосу мүмкіндігі қарастырылған. Ол үшін қоспаларды енгізу жүйесін жалғауға арналған, тығынмен жабылған штуцер көзделген.

Құю постының құрамындағы сорғы блогына электр сорғы агрегаты кіреді. Оның кірісіне қолмен басқарылатын шарикті кран орнатылады. Температура өзгерген кезде кіріс құбыржолының қауіпті жылжуын болдырмау үшін сорғы блогының кірісінде өтемдеуіш қарастырылған.

Автоцистерналарды құю алаңдары +3 м белгісінде қызмет көрсетуге арналған металл эстакадалармен және шеткі жақтарында марштық баспалдақтармен жабдықталады. Оларға мына талаптар қойылады:

• баспалдақтың ені — 0,73 м, көлбеу бұрышы — 45°;
• құю эстакадасының жабыны мен баспалдақ сатылары оттан қорғау жабынынсыз, кертілген созба табақтан немесе қырымен қойылған жолақты болаттан жасалады;
• құю эстакадасында автоцистернаға өтуге арналған қажетті мөлшердегі қайырмалы көпіршелер болады.

Қайырмалы көпіршелер (ауыспалы траптар) гараж күйінен жұмыс күйіне жылжытылған кезде олардың сатылары әрдайым көлденең қалыпта болатын принциппен жұмыс істейді. Көпіршелер тұтқалармен және қосымша қауіпсіздік қоршауларымен жабдықталған.

Көпірше конструкциясында мыналар қарастырылған:

• көпіршенің гараж күйінде өздігінен жылжуына жол бермейтін сенімді механикалық бекіткіш;
• көпіршені гараж күйінен жұмыс күйіне ашқан кезде оператордың аяқтарын сатылардың қысып қалуынан қорғайтын механизм;
• гараж күйінің датчигі;
• көпіршені жұмыс күйінде автоматты түрде бекіту механизмі;
• коррозияға қарсы жабын.